یومِ مزدور

اس کے نام پہ چھٹی ہو گی اور وہ کام پہ جائے گا
میرے دیس میں کل مزدور کا دن منایا جائے گا

یوم مزدور۔۔۔۔۔۔۔۔ مزدوروں کے حقوق کی بحالی کے لیے آواز بلند کرنا، ان کے ساتھ یکجہتی کا اظہار یعنی یہ کہنا، کہلوانا، اہل عالم کی سماعتوں تک یہ پیغام پہنچانا کہ مزدور کو بھی عزت کے ساتھ جینے کا حق دیا جائے۔ روٹی، کپڑا، مکان، علاج، تعلیم جیسی بنیادی سہولتوں میں اسے بھی برابر کا حصہ دار سمجھا جائے۔ محنت کے مطابق بروقت اجرت اسے بھی دی جائے۔ مگر افسوس ــ! یہ سب صرف کہنے کی باتیں ہیں۔ جلسے، جلوس، تقاریر، ریلیاں، مزدر کی قسمت بدلنے کے وعدے بہت۔۔۔۔۔مگر پس پردہ کچھ سلگتے ہوئے حقائق۔۔۔۔۔ یہ کہ اس دن بھی مزدور کے گھر میں فاقہ ہوتا ہے۔۔۔۔۔۔۔ وہ مزدوری کی تلاش میں مارا مارا پھرتاہے۔۔۔۔۔۔۔۔ اس کے بچے کو فیس جمع نہ کروانے پر سکول سے نکال دیا جاتا ہے۔۔۔۔۔۔۔ علاج کی بہتر سہولیات نہ ملنے پر اس کی بیوی زندگی کی بازی ہار دیتی ہے۔۔۔۔۔۔۔ دہلیز پہ بیٹھی بیٹی کے بالوں میں چاندی اتر آتی ہے۔۔۔۔۔۔۔ معمولی غلطی کی پاداش میں اس کا محنت کرنے والا ہاتھ مشین میں دے کر کاٹ دیا جاتا ہے۔ گویا یہ طے ہے کہ۔۔۔۔۔ ہزاروں یوم مزدورمنائیں۔۔۔۔ پھر بھی وہ حالات کے ہاتھوں۔۔مجبورو مقہور صرف ایک دن کے لئے مشہور۔۔ اور پھر سارا سال اپنی حالت بدلنے سے معذور۔۔ایک بے بس مزدور ہی رہے گا۔ نہ اس کے گھر سے فاقہ کشی ڈیرا ٹھائے گی، نہ اس کی اولاد اچھی تعلیم پائے گی، نہ بیٹی قیمتی جہیز لے کر بر وقت اپنے گھر کی ہو پائے گی، نہ اس کی محنت رنگ لائے گی۔ اس لئے مزدور بصد احترام یہ درخواست کرتا ہے۔

ہمارے ارمانوں سے سجائو شاہ وقت اور محل بنائو
اپنا تو فٹ پاتھ ٹھکانہ، دیکھ کے ہم کو مت شرمائو ـــ

The post یومِ مزدور appeared first on دنیا اردو بلاگ.

from دنیا اردو بلاگ https://ift.tt/2FBO5RE