جعلی ادویہ کیس میں نجی کمپنی کا مالک گرفتار، فیکٹری بند کرنے کا حکم

 اسلام آباد: چیف جسٹس کے حکم پر غیر رجسٹرڈ دوائیں بنانے والی نجی کمپنی کے مالک کو گرفتار کرلیا گیا۔

سپریم کورٹ میں جعلی ادویات سے متعلق کیس کی سماعت ہوئی۔ نجی کمپنی کے مالک عثمان عدالت میں پیش ہوئے تو چیف جسٹس نے پوچھا کہ عثمان صاحب آپ کس کس کو بلیک میل کریں گے؟۔

سپریم کورٹ نے نجی کمپنی فارما ایورسٹ کے مالک عثمان کو گرفتار کرنے کا حکم دے دیا جس پر عثمان کو کمرہ عدالت سے گرفتار کرلیا گیا۔ چیف جسٹس نے حکم دیا کہ ڈریپ عثمان کی فیکٹری کو فوری طور پر بند کرکے ٹیک اوور کر لے۔ چیف جسٹس نے پوچھا کہ کون سا ڈی آئی جی ہے جو عثمان کی حمایت کریگا، محمد عثمان کی طرف سے کسی وکیل کو پیش نہیں ہونے دینگے۔

سپریم کورٹ نے ایف آئی اے کو نجی کمپنی فارما ایورسٹ کے خلاف مقدمات درج کرنے کا حکم بھی دیتے ہوئے کہا کہ ایف آئی اے اور نیب حکام کمپنی کے اثاثوں کی چھان بین کریں۔ دوران سماعت ہی سپریم کورٹ نے آر پی او بہاولپور کی معطلی کا حکم واپس لیتے ہوئے انہیں 8 مارچ تک کام جاری رکھنے کی ہدایت کی۔

ڈریپ حکام نے بتایا کہ کمپنی 22 غیر رجسٹرڈ ادویات بنارہی ہے، کمپنی کا لائسنس معطل کرنا چاہتے ہیں تو عدالتی فیصلے آجاتے ہیں، یہ معمہ ہے کہ کمپنی ادویات کیلئے خام مال کہاں سے منگواتی ہے۔ چیف جسٹس نے حکم دیا کہ آئی جی پنجاب اپنے ڈی آئی جی راجہ رفعت کے خلاف تحقیقات کریں۔ عدالت نے ڈی آئی جی رفعت مختار کو 8مارچ کو لاہور میں طلب کرلیا۔

واضح رہے کہ دو مارچ جمعے کو اس کیس کی سماعت میں ڈرگ ریگولیٹری اتھارٹی آف پاکستان (ڈریپ) کے حکام نے عدالت کو بتایا تھا کہ اسلام آباد میں ایورسٹ نام کی کمپنی جنسی ادویات بناتی ہے اور اس کمپنی کے مالک محمد عثمان اتنے طاقتور ہیں کہ ڈریپ کا کوئی افسر کمپنی یا دفتر میں داخل نہیں ہوسکتا، وہ چار سال سے اس کمپنی کے خلاف بے یارومددگار ہیں۔ اس پر چیف جسٹس نے ریمارکس دیے تھے کہ اب تو میں بھی اس شخص کو دیکھنے کا مشتاق ہو گیا ہوں۔

The post جعلی ادویہ کیس میں نجی کمپنی کا مالک گرفتار، فیکٹری بند کرنے کا حکم appeared first on ایکسپریس اردو.

from ایکسپریس اردو http://ift.tt/2FYCApl