پاسبانِ وطن تیری جرآت کو سلام

ایڈولف ہٹلر کا کہنا تھا کہ کسی ملک کی فوج کو اگر تباہ کرنا ہو تو اس ملک کی عوام کے دل میں فوج کے خلاف نفرت پیدا کردو، فوج خود بخود ختم ہو جائے گی۔ ہم آج کل یہی کر رہے ہیں۔ ایک دن ایک محفل میں ایک انتہائی معزز شخص کی زبان سے ایک جملہ سنا، سننے کے بعد بہت حیرت ہوئی، جملہ کیا تھا آپکی نظر کیے دیتا ہوں “پاکستانی فوج صرف عیاشی کرتی ہے، ملکی بجٹ کا بڑا حصہ ہڑپ کر جاتی ہے، اس ملک پاکستان میں دو ادارے ایسے ہیں جنکا آڈٹ نہیں ہوتا، ایک پاکستان آرمی دوسرا پاکستان کا میڈیا”۔ یہ بات سننے کے بعد بظاہر تو لگا کہ صاحب پاکستانی فوج سے کافی خفا ہیں، لیکن دریافت کرنے پر معلوم ہوا کہ انہوں نے یہ بات کسی سیاست دان کی زبان سے سنی ہے۔

ملکی سیاست ان دنوں ہچکولے کھا رہی ہے اور ہر زبان زد عام تھا کہ ملک میں مارشل لاء کی سی کیفیت پیدا ہو گئی ہے، آرمی چیف کو سینیٹ میں بلا کے بریفنگ مانگی گئی جیسے کہ تسلی لینی ہو کہ ملک میں جمہوریت محفوظ ہے۔ ڈی جی آئی ایس پی آر کی ہر پریس بریفنگ میں یہ سوال اٹھانا کہ کیا پاکستان کی جمہوریت کو کوئی خطرہ ہے اور انکا ہر بار یہ جواب دینا کہ نہیں جمہوریت کو کوئی خطرہ نہیں ہے،یہ ان شر پسند عناصر کے منہ پر طمانچا ہے جو ہر وقت اس کوشش میں رہتے ہیں کہ ملک کے سیاسی حالات خراب ہوں۔

ڈونلڈ ٹرمپ نے اپنی ایک ٹویٹ میں لکھا کہ وہ پاکستان کی فوجی امداد بند کردیں گے۔ وہ اپنی اس ٹویٹ کے ذریعے پاکستان کی عوام کے دل میں یہ بات ڈالنے کی کوشش کر رہے ہیں کہ پاکستان کی فوج امریکہ کی دی ہوئی فوجی امداد سے چلتی ہے۔ ڈونلڈ ٹرمپ کی اس ٹویٹ کے پیچھے ہمارا ازلی دشمن انڈیا ہوسکتا ہے جسے سی پیک جیسا منصوبہ ایک آنکھ نہیں بھاتا۔

پاکستان کے دشمن ممالک کو یہ سمجھ لینا چاہئیے کہ ہم وہ قوم ہیں جو وقت آنے پر اپنی فوج کے ساتھ شانہ بشانہ بے کھڑی ہو کر لڑ سکتے ہیں۔ وہ ملکی اور غیر ملکی شر پسند عناصر جو پاکستانی فوج کے کردار پہ باتیں کرتے تھکتے نہیں وہ لوگ بھی ملکی حالات خراب ہونے پر فوج کی طرف ہی دیکھتے ہیں۔

کراچی وہ شہر تھا جہاں سب جانے سے ڈرتے تھے دن رات ٹارگٹ کلنگ، بھتہ خوری، بوری بند لاشیں ملنا ایک عام سا کام تھا جس نے نہ صرف کراچی بلکہ پورے ملک کی عوام کے ہوش اڑا رکھے تھے، پاکستان رینجرز نے کراچی کو ہولڈ کیا اور اسے امن کا گہوارہ بنایا۔ 2013ء میں کراچی میں دہشتگردی کے واقعات 57، اور 2014ء میں 66 اور 2015ء میں 18 اور 2016ء میں 16 جبکہ 2017ء میں صرف دہشتگردی کا 1 واقعہ پیش آیا جو پاکستان رینجرز کی کامیابی کا منہ بولتا ثبوت ہے۔ اسی طرح ٹارگٹ کلنگ کے بدستور 2013ء, 2014ء , 2015ء , 2016ء , 2017ء میں 965 , 602 , 199 , 89 اور 2017 میں صرف 45 کیسز ہوئے۔

آپریشن ردالفساد کے تحت IBOs/Combing Operations کی تعداد میں بالترتیب پنجاب میں 13011، سندھ میں 2303، بلوچستان میں 1734، کے پی کے اور فاٹا میں 2655 آپریشن کیے گئے جس میں بہت سے دہشتگرد مارے بھی گئے اور گرفتار بھی ہوئے۔ پاکستان کے وہ علاقے جہاں کوئی جاتا نہیں تھا، جو دہشتگردوں کی آماجگاہ تھے انہیں نہ صرف تباہ کیا بلکہ وہاں امن کی فضا ء قائم کی اور زندگی کی روانگی کو دوبارہ بحال کیا۔ پاکستان کے علاقے جن میں بنوں، قرم، اورکزئی، خیبر، پشاور، مہمند، باجوڑ، مالاکنڈ اور دیر جیسے علاقوں میں دہشتگردوں کی آماجگاہ کو ختم کر کے وہاں کمیونیکیشن سیکٹرز قائم کر دیے گئے۔ بلوچستان کے ہیلتھ اور ایجوکیشن سیکٹر میں پاک فوج کا کردار کسی سے کم نہیں، بلوچ فراریوں کا پاک فوج کے سامنے ہتھیار ڈالنا اور عام انسان کی طرح زندگی گزارنے کا عہد کرنا پاک فوج کی وہ کامیابی ہے جسے پس بشت نہیں ڈالا جا سکتا۔

2013ء سے اب تک پورے ملک میں 480 دہشتگردوں کے منصوبوں کو ناکام بنایا گیا اور پاکستانی قوم کی جانیں ضائع ہونے سے بچایا گیا۔ نیشنل ایکشن پلان کے تحت جو ملٹری کورٹس تشکیل دی گئی ان میں موجود مقدمات جو پہلے ٹینور میں داخل ہوئے وہ 274 تھے جن میں سے 161 دہشتگردوں کو آج تک پھانسی کی سزا سنائی جا چکی ہے جن میں سے 56 کو پھانسی دی جا چکی ہے۔ یاد رہے 56 میں سے 43 دہشتگردوں کو پھانسی سال 2017ء میں دی گئی۔ 19 نومبر2017ء کو مزید 120 کیسز ملٹری کورٹس کے حوالے کیے گئے۔

ملک مخالف عناصر جو ہمسایہ ملک افغانستان میں بیٹھ کر کاروائیاں کرتا ہے، اس سے نپٹنے کے لیے بارڈر مینجمنٹ کو مزید بہتر کرنے کے لیے پاک افغان بارڈر پر باڑ لگانے کا کام تیزی سے جاری ہے۔ بلوچستان اور فاٹا کے علاقہ میں اپنے ملک کو محفوظ کرنے کے لیے جو فینسنگ کا کام جاری ہے جلد مکمل کر کے ملک کو محفوظ کیا جائے گا۔

میں پوچھتا ہوں اس شرپسند عناصر سے جو کہتے ہیں کہ فوج پیسہ کھا جاتی ہے۔ اگر فوج واقعی میں کھا جاتی ہے تو یہ آپریشنز کیسے ہو رہے ہیں۔ کیا پاکستان میں جو امن قائم ہوا ہے وہ کسی غیر ملکی فنڈنگ کی بدولت ہوا ہے؟ نہیں بالکل بھی نہیں بلکہ یہ پاکستان کی عوام اور پاکستان کی بہادر افواج کی بدولت ہے جو ملک کی حفاظت کے لیے اپنی جانوں تک کا نذرانہ پیش کر دیتے ہیں اور زبان پہ پھر بھی ایک ہی نعرہ رہتا ہے کہ پاکستان زندہ باد۔ خدارا ملک پاکستان کی بہادر افواج کی کردار کشی بند کیجیے اور اس ملک کو امن کا گہوارہ بنانے کے لیے پاک فوج کا ساتھ دیں۔

The post پاسبانِ وطن تیری جرآت کو سلام appeared first on دنیا اردو بلاگ.

from دنیا اردو بلاگ http://ift.tt/2BrWGEC